Esquerda Unida de Cambre solicita ao Concello que asuma as competencias das que dispón en materia de educación, e dentro das súas posibilidades facilite o máximo posible os medios necesarios para o cumprimento dos protocolos sanitarios respecto ao COVID19, co obxectivo de garantir o dereito á educación e a protección da saúde.
O Concello non pode soamente esperar a que a Xunta actúe, en palabras da súa concelleira Olga Santos “Segundo a Lei de Bases de Réxime local, o Concello tamén dispón de competencias en materia educativa que deben ser asumidas”. “ É certo que a Xunta é a principal responsable e polas súas competencias, xoga un papel principal, pero o Concello debe asumir tamén a súa parte, aproveitar a capacidade de actuación para mellorar en todo o posible as eivas detectadas garantindo un bo desenvolvemento do curso.”
As recentes manifestacións realizadas polo alcalde Óscar G. Patiño desvinculándose completamente de calquera tipo de acción a realizar por parte do Concello, resultan unha irresponsabilidade, ademais de non ser a primeira vez que dende o Goberno de Cambre non se asumen competencias nun problema, esperando de brazos cruzados a que actúen outras Administracións.
Esquerda Unida de Cambre súmase tamén á solicitude feita pola organización a nivel galego, na que se insta á Consellería a que actúe con responsabilidade e diálogo para establecer un protocolo coa consecuente adaptación dos medios humanos e materiais.
Pola súa banda a coordinadora, Loreto Taibo, manifesta que “estamos a falar de garantir dous dereitos básicos como son a educación e a saúde, aquí non se pode escatimar”.
Por iso, a agrupación de Esquerda Unida de Cambre considera importante levar o asunto a este vindeiro pleno, no que mediante un rogo, solicita ao concello que no ámbito das súas competencias municipais, leve a cabo as medidas necesarias para garantir o cumprimento dos protocolos en materia de protección da saúde que permitan un correcto funcionamento das clases no novo curso, protexendo tamén o dereito á educación das nenas e nenos.
